29/01/2024 Laxe destina máis de 24 mil euros á mellora dos camiños de acceso a Matío e As Virtudes

O Concello de Laxe destinará 24.051,69 euros á mellora dos camiños de acceso a Matío e As Virtudes. As obras están financiadas a través da Axencia Galega de Desenvolvemento Rural, ao abeiro do Plan de mellora de camiños rurais 2023-2024, cofinanciado con Fondo Europeo Agrícola de Desenvolvemento Rural (Feader) no marco do Plan Estratéxico da PAC 2023-2027 en Galicia, e completa o plan de actuación iniciado cos traballos en Fenllido.

A primeira das execucións mencionadas inclúe a demolición do muro existente nos primeiros 18 metros do tramo de actuación para a súa posterior reconstrución. En primeiro lugar, executarase unha zapata corrida mediante formigón armado de 50 cm de base e 40 cm de altura. Logo realizarase o muro á mesma altura que o existente. Nos metros restantes mellorarase a capa de rodadura.

A obra completarase coa instalación dun sinal vertical de STOP na intersección entre o camiño e a estrada municipal.

A segunda intervención está prevista para o punto de acceso ao núcleo rural de As Virtudes, que presenta un claro estado de deterioro na actualidade.

Os traballos inclúen a limpeza e preparación de explanación. Completarase coa pavimentación de formigón armado con fibras sintéticas e coa instalación dun sinal de STOP.

O alcalde en funcións, Francisco Charlín, destacou que se trata de dúas obras que permiten “mellorar os accesos a dous puntos moi importantes para o noso rural”.