22/05/2024 O Dr. Calafiore responderá en Laxe as dúbidas máis comúns sobre patoloxías da próstata e saúde sexual

O Salón de Actos Culturais do Concello de Laxe acollerá este sábado, 25 de maio, ás 19:00 horas, unha charla informativa sobre prevención de patoloxías de próstata nos homes e a incontinencia urinaria en homes e mulleres.  

A sesión, que estará impartida polo Dr. Darío Calafiore, especialista en Uroloxía e Androloxía no Hospital Lucus Augusti (Lugo) e na Clínica Bergantiños (Carballo), ten o obxectivo de achegar estes temas á cidadanía e responder ás dúbidas máis frecuentes sobre estas cuestións.  

Para iso, o evento levarase a cabo nun ton informativo, cunha linguaxe próxima e centrada en 10 preguntas básicas sobre a saúde da próstata e a saúde sexual. Ademais, habilitouse unha ligazón para que as persoas interesadas en participar poidan deixar as súas preguntas de maneira anónima que serán respondidas durante a charla.

Mensaxes claves  

O cancro de próstata é o terceiro máis mortal nos homes, aínda que o 90 % poderían curarse en caso de terse detectado a tempo. Un de cada catro homes consultan o seu médico por problemas de sexualidade e as perdas de ouriña en mulleres teñen solución nunha alta porcentaxe.  

Estes son algúns dos temas que, entre outros moitos, tratará Calafiore durante a súa charla.