O Concello de Laxe mellorou os camiños da parroquia de Serantes cunha subvención de Agader por valor de 58.046,68 €

O Concello de Laxe levou a cabo a mellora de varios camiños rurais na parroquia de Serantes grazas a unha subvención concedida pola Axencia Galega de Desenvolvemento Rural (Agader), ao abeiro da Resolución do 19 de decembro de 2023 pola que se aprobou o Plan marco de mellora de camiños municipais de acceso a parcelas agrícolas 2024-2025. A axuda, por un importe total de 58.046,68 euros, estivo cofinanciada polo Fondo Europeo Agrícola de Desenvolvemento Rural (Feader), no marco do Programa de Desenvolvemento Rural (PDR) 2014-2020, e permitiu executar o “Proxecto técnico de mellora de camiños rurais na parroquia de Serantes, Concello de Laxe”, que mellorou notablemente a accesibilidade ás parcelas agroganadeiras e o tránsito pola contorna rural. Dentro deste proxecto tamén se incluíu a contratación do servizo de redacción dun estudo integral da rede viaria municipal de Laxe, segundo o establecido no artigo 5.3 da resolución. Este estudo recolleu:

• A descrición da rede viaria existente: estado, lonxitude, tipos de capa de rodadura, niveis de utilización, etc.
• A identificación das vías de acceso a explotacións e parcelas agroganadeiras.
• A elaboración dun sistema de información xeográfica co trazado da rede viaria municipal.
• A priorización das futuras intervencións en tres niveis (alto, medio e baixo), atendendo a criterios como a intensidade de tráfico, o estado das vías, o acceso a recursos produtivos, turísticos e a núcleos de poboación.
• A identificación de camiños con continuidade en concellos limítrofes, facilitando así a planificación e coordinación de actuacións futuras.

Este estudo, xa realizado, servirá como documento programático de referencia para futuras actuacións que poidan ser financiadas polas distintas liñas de axuda da Consellería do Medio Rural. Desde o Concello de Laxe queremos agradecer a colaboración institucional que fixo posible esta mellora, contribuíndo ao desenvolvemento sostible e á calidade de vida da veciñanza do noso rural 🌿🚜